Biriketan haziak landatuko nituzke,

klima beroetako liliak gustoko dituzula esango bazenit

.

Hemen

Ipar poloan

hazten ez diren

baina ohe-ondoko mahaitxoan nahi zenituzkeen

loreak landatuko nituzke

.

Begietatik ateratzen ez zaizkidan malkoek ureztatuko lituzkete nire biriketako haziak

-orain dela asko ez dudala kanporantza negar egiten-

malkoak ere izozten dira hemen

.

Eta horrela,

gutxinaka-gutxinaka,

nire barnea betetzen joango litzateke,

Klima beroetako liliz betetzen

Hosto, adartxo eta zurtoinez betetzen

.

Biriketan sustraituko litzaizkidake orduan loreak eta zuri emango nizkizukeen arren,

niri lotuta geratuko lirateke betirako

niri lotuta geratuko zinateke betirako

.

Horiek dira

orain

sentitzen duzun hutsunerik handienaren subjektu

.

Eguzkia oso noizean behin agertzen den munduaren zati honetan, loreak nire barnean hazten utziko nituzke,

zuk eskatuko bazenit

.

Ez dakit zergatik etorri ginen liliak hazten ez diren toki batera

eskuak izozten zaizkigun toki batera

Ez dakit zergatik etorri ginen hutsik dagoen toki batera

Isiltasunak ere oihartzuna sortzen duen toki batera

batera

batera

.

Hotz mingarria egiten duen Ipar polo honetan,

eguzkiak ez du jotzen eta espaloien arrakaletatik ez dira loreak

ezkutatuta bada ere

agertzen

.

Hotz zarela esaten duzu

Eta nik -Itzul gaitezen etxera, laztana

Baina isilik geratzen zara

Arnasteari uzten diozula iruditzen zait

Eta orduan pentsatzen dut,

biriketan haziak landatuko nituzkeela,

klima beroetako liliak gustoko dituzula esango bazenit

.

Baina ez didazu eskatzen

Ez didazu ezer esaten

Zure isiltasunaren oihartzunak nire hitzak estaltzen ditu

-ez nauzu entzuten-

.

Eska iezadazu, mesedez- diote nire begiek

Loreak behar ditut ohe-ondoko mahaitxoan- zureek

Baina afonia dirudien kondizio honek ez digu hitz egiten uzten

-ez zaitut entzuten-

.

Isil dadila behingoz oihartzun madarikatu hau!

hau

hau

.

Kondenaturik gaude, laztana -esan zenidan azkenik

Zertara kondenaturik? -nik

Ipar poloan bizitzera -hasi zinen

Ohe-ondoko mahaitxoan lorerik ez izatera

Eskuak izoztera

Eguzkia bilatu

baina ez aurkitzera

Zu birikak negutegi bezala erabiltzera kondenaturik zauden moduan nago ni loreak behar ditudalarena egitera

Baina ez da egia

Behar zaitudalaren ilusio soila sortzeko besterik ez da,

antzerki-muntaia dramatiko hau

antzerki-muntaia ezinezko hau

.

Ipar Polora etorri behar izan gara maite ez zaitudalarena azaltzeko

eta oraindik ez zara konturatu

Zenbat denbora gehiago egon behar dut isilik,

hutsaren oihartzunak torturatu zaitzan?

Zenbat aldiz esan behar dizut eskuak izozten zaizkidala,

ihes egin nahi dudala uler dezazun?

Ez nauzu ulertzen,

Ez nauzu entzuten,

entzun nazazu behingoz!

behingoz

behingoz

.

Orduan

nik

negar egin nuen 3 segunduz

barrurantza, berriro

baina ez dakit zergatik izan zen;

maite ez ninduzula onartu zenidalako

ala

isiltasuna faltan bota nuelako

-agian biak gauza bera ziren-

.

Baina bat-batean

inolako abisurik gabe

Ur tanta bakar baten zain egon izan balitz bezala,

eztarrian zerbait sentitu eta lore bat atera zitzaidan ahotik

Irentsi nahi

baina ezin

Eta berriz ere isildu zinen

betirako isildu

Loratu berri zena moztu

eta ohe-ondoko mahaitxoan jarri nizun

Jada ez zenuen bertan gehiagotan lo egin

.

Ordutik ez da Ipar poloan ezer gehiago entzun

Oihartzuna bai

oihartzun ozena

Ordutik negar egiten dut egunero

barrurantza negar

Eta ordutik 5 lili jaiotzen dira egunero ere

Eta ez dira jada etxean sartzen

ez naiz jada etxean sartzen

.

Ez dakit zergatik etorri ginen hutsik dagoen toki batera

isiltasunak ere oihartzuna sortzen duen toki batera

batera

batera

.

Herrialde honek ez du jada zure usaina,

Baina nik ezin dut alde egin

Arrazoi zenuen

Birikak negutegi bezala erabiltzera kondenaturik nago

Etengabeko izozte hontara kondenaturik

Oihartzun mingarri hontara kondenaturik

.

Eta oraindik ere,

biriketan haziak landatuko nituzke,

klima beroetako liliak gustoko dituzula esango bazenit

.

.

.

.

2024ko otsaila